摩纳哥望点「锡」成金
法甲喺周六深夜展开第十二轮嘅第二场较量，争标份子摩纳哥将喺主场与身处降班区域内嘅南锡一决高下。从牌面嚟睇，摩纳哥明显比南锡好牌，即使南锡近期有复苏嘅迹象，但球队缺乏攻击重心，佢哋依然未有可以喺摩纳哥身上抢分嘅本钱。
沉寂多时嘅法卡奥终于发威喇，佢喺上仗欧冠杯分组赛中梅开二度，帮助摩纳哥3比0击败莫斯科中央陆军，球队只要喺下一轮欧冠杯主场对阵热刺嘅比赛唔输波，佢哋就可以提前1轮喺死亡之组E组突围而出晋级十六强，呢场大胜无疑振奋士气。返到联赛，由于班霸巴黎圣日门今夏流失后卫大卫雷斯以及锋霸伊巴谦莫域从而实力大减，因此摩纳哥亦睇到联赛争冠嘅希望，佢哋11轮过后与圣日门同样攞到23分，以得失球差嘅优势力压后者位列法甲次席，当然，排名榜首嘅系今季异军突起嘅奈斯。上轮联赛，摩纳哥畀圣伊天迫和，只攞到1分嘅佢哋又减缓追赶奈斯嘅脚步，本轮未踢之前，球队已经落后奈斯6分，幸好，摩纳哥接著落嚟嘅2轮联赛系面对榜尾队伍南锡以及罗连安特，呢2场联赛球队绝对唔容许有失分嘅情况出现，好彩佢哋系一支进攻欲望相当强烈嘅队伍，均场联赛攻入2.73波嘅攻击力喺法甲独领风骚，除咗法卡奥之外，汤马士利马同埋谢美恩呢班攻击手都具备一定嘅杀伤力，极为擅长主场搵食嘅摩纳哥今仗誓要将南锡玩于股掌之上。
讲起南锡呢支升班马，佢哋好似仲未搵到如何立足于法甲嘅方法，球队今季只赢过2场波，对手分别系罗连安特和卡昂，呢两支队伍依家都同南锡一样喺降班区域内，而喺圣日门以及里昂此等豪门面前，南锡根本就冇还击之力，欺善怕恶嘅特质完全表露喺球迷眼前。虽然南锡均场联赛只失1.18波嘅防守尚算稳健，但系进攻端唔争气，均场只有0.64波入数，而佢哋近2场各项赛事赢球嘅对手都系卡昂，卡昂嘅防守可以讲话系法甲最容易被撕破嘅队伍之一，咁呢两场波入咗6球就唔可以代表南锡嘅攻击线复苏。另外，从南锡嘅班底可以睇得出，阵中严重缺乏有征战法甲经验嘅球员，呢个绝对系南锡今季落得如此惨况嘅主因之一。再嚟睇返摩纳哥嘅主场气势，佢哋联赛已经攞到主场四连胜，当中均场攻入3.5球，亚洲让球盘亦连赢4场，今仗澳彩开出摩纳哥让一球嘅亚盘，睇嚟一场大屠杀即将要上演。