札幌冈萨多定要直「岛」黄龙
周日中午，日乙倒数第三轮火热进行，榜首嘅札幌冈萨多将作客挑战中游份子德岛漩涡。德岛漩涡已经无欲无求，反观札幌冈萨多还要为一席直接升班资格作最后嘅努力，德岛漩涡好大机会会畀返几分薄面札幌冈萨多呢支联赛领头羊。
德岛漩涡近期联赛攞到2胜1和嘅佳绩，不过呢3个对手都系如今积分榜排名比自己低嘅队伍，所以攞到咁好嘅成绩亦系本分，佢哋亦藉此完全脱离降班危机。由于日乙嘅赛制系排名第三至第六位嘅队伍先有资格踢升班附加赛，如今还剩3轮联赛嘅情况下，落后第六位京都不死鸟12分嘅德岛漩涡已经冇资格去争夺升班附加赛嘅名额，余下3轮联赛对于球队嚟讲只不过系例行公事，佢哋可能会畀后生仔更多去感受下日乙嘅氛围，所以冇乜战意可言嘅德岛漩涡今仗主场出击还系唔好过份高估。
札幌冈萨多今季日乙由第十七轮起就一直未让出榜首位置，睇得出佢哋对重返日职联嘅决心。不过札幌冈萨多之前有所松懈，遭遇连续3轮联赛不胜，眼见形势唔对路，球队上仗亦发一发力，攻击手都仓贤亦斩获入球，最终佢哋4比1击败赞岐卡马达马尼重返胜轨，不过佢哋还未拿到直接升班资格。依家日乙当中，争夺两席直接升班资格嘅就得札幌冈萨多、松本山雅和清水心跳三队，虽然排名第四位嘅大阪樱花落后第二位嘅松本山雅9分还系有希望，但要寄望奇迹嘅出现囖，而札幌冈萨多则占据一定嘅优势，佢哋如今领先第三位嘅清水心跳6分，而球队为咗避免夜长梦多，今仗肯定唔会再放水。