勝利齊腳打殘水手
打仗講求天時、地利同人和，只要集齊晒呢幾瓣就可以百戰百勝。其實踢波都係一樣，好似墨爾本勝利今日晏晝喺主場鬥中岸水手，就儲齊晒呢三樣贏波元素，相信大勝一場都冇咩難度可言，1.85倍「讓主」有買趁早。
（有線64、203周四下午5:00直播）
勝利前鋒貝利沙腳風順
國際賽往往有唔少主力為國效命，搞到仲要踢聯賽嘅球隊戰鬥力大減。好在，呢次勝利得天獨厚，前鋒干洛皮恩、守將史葛加路維同加利富高今仗可以準時報到，大增排兵布陣嘅選擇。更重要係王牌射手貝利沙呢期腳風勁順，呢位阿爾巴尼亞前鋒近14次披甲轟13粒，更何況計埋盃賽，勝利開季主場5連勝，要炒實力一般嘅水手唔難。
水手近18仗作客不勝
另邊廂嘅水手出晒名係澳職作客蟲，佢哋連續18場作客都未贏過，真係睇見都唔開胃。而且水手連續5次交鋒都輸畀勝利，心理質素輸晒，班球員隨時未開波都已經驚到腳軟咯。仲有呀，中場法比奧費拉拿、格連迪菲路、後衞麥真治3件主力唔踢得，呢鋪想爆得出？冇機會囉！