勝利着晒火追殺水手
澳職獨腳戲，墨爾本勝利主場對中岸水手，因為要踢澳足盃決賽而踢少一場聯賽嘅勝利，今場贏埋就可以追至同榜首嘅布里斯班獅吼同分，王牌射手貝利沙狀態又大勇，睇怕中岸水手都係無力招架，捧讓球主勝！
（有線64及203台周四下午5時直播）
近4戰全勝 貝利沙弗爆
上季澳職總冠軍墨爾本勝利真係冇改錯名，近排係咁贏波，弗到冇人有，連贏4仗，仲要場場都至少贏兩球，包括澳足盃決賽擊敗珀斯光輝2比0成功捧盃，士氣高昂。勝利神射手貝利沙喺呢4場均有士哥，一共入咗6球，腳風順到爆，今場真係冇理由唔捧勝利囉！
中岸水手上場作客紐卡素噴射機打出今季代表作，開波初段就有後衞麥真治被逐離場，水手大部分時間10人應戰，但都可以逼和對手1比1，係叻仔嘅！不過水手對賽往績畀勝利食住呢，對上5次對勝利全敗，當中4場均輸兩球或以上。勝利現以10分排第3，今場贏咗就可以同榜首嘅布里斯班獅吼同分，戰意鮮明，水手都係聽做炮灰喇！