法達斯維：熱刺追車半場屈機

 
今晚英超頭場上演倫敦打吡，由「2哥」熱刺主場硬撼「大黃蜂」屈福特。熱刺於周中快車末段反勝史雲斯，士氣大振，雖然射手哈利卡尼仲養緊傷，但為追「車」保住爭標機會必搏到盡，加上主場出擊玩慣「閃擊」，今仗勢必快刀斬亂麻，1.6倍半場主勝趁「熱」食。

（now 621及LeSports HK 應用程式周六晚7時30分直播）

主場愛「閃擊戰」
熱刺自主帥普捷天奴接手後，近季表現當相平穩，就算哈利卡尼繼續缺陣都冇有怕，好似周中作客史雲斯一直落後1球，去到88分鐘後先後靠迪利阿里、孫興民及基斯甸艾歷臣各省1粒反勝3比1，一改以往「軟腳蟹」作風。依家熱刺落後榜首車路士7分，可以話係聯賽唯一能威脅車仔嘅球隊，為追「車」保爭標機會，今仗唔會放過屈福特。況且熱刺於白鹿徑球場出擊準繩，近10仗聯賽主場贏晒，當中有7仗上半場就領先，一贏就贏到尾，可見佢哋玩「閃擊戰」有一手。

另邊廂屈福特近9仗聯賽作客輸7場，今仗仲缺少卡保奧、比哈美、莫路沙拉迪及羅拔圖佩雷拉等主力，難擋熱刺初段來勢洶洶嘅狂轟，1.6倍半場主勝絕對值支持。