Mic少：主力抖夠戰意爆燈 銀河艦隊打吡W德

 
 
西甲今晚上演「馬德里打吡」，皇家馬德里主場迎戰馬德里體育會，從兩隊上仗周中快車排陣，已反映雙方對今仗重視程度有明顯分野。皇馬上場收起「BBC」鋒線，留力打吡戰昭然若揭，對3分志在必得。反觀，馬體會聯賽爭標機會渺茫，應會專注歐聯，球隊目光一早投放下周中8強首回合對李斯特城，難分心破壞「銀河艦隊」大事，捧皇馬主勝。

（Now 632周六晚10時15分直播）

今季西甲冠軍寶座已成為皇馬同巴塞之爭，皇馬僅領先「地上最強」2分，即使踢少1場，但優勢並唔明顯，因為兩隊將於本月24日凌晨交鋒，足以改寫形勢。皇馬為保榜首，絕對冇失分空間，尤其係今場遇上同市死敵，更加要打醒十二分精神，全力以赴。因此，皇馬教練施丹上仗聯賽周中快車對雷加利斯，收起C朗、加里夫巴利、賓施馬、卻奧斯，莫迪歷亦只係後備上陣踢10分鐘，一班主力抖足精神，當今場係生死戰，戰意肯定非常高昂。皇馬近11場聯賽主場更取得10勝1和，首循環更加作客大勝馬體會3比0，今仗返回巴拿貝球場，勝算更高。

馬體會爭標渺茫博歐聯
馬體會已落後皇馬10分，兼踢多1場，爭標機會名存實亡，馬體會之所以落後咁多分，好大程度因為遇親強隊都唔掂，除咗首循環吞皇馬3蛋之外，對巴塞亦僅1和1負，並作客輸畀3支前列球隊西維爾、皇馬蘇斯達、維拉利爾，今場作客皇馬，情況更加唔樂觀。

既然聯賽已經「冇前途」，相信馬體會將集中力量踢歐聯，佢哋過去3屆兩次入決賽都功虧一簣，今屆更加想捧番次盃。對馬體會而言，下周中8強首回合主場鬥李斯特城，比今場打吡戰更重要，預料唔會浪費氣力，同皇馬鬥氣。