澳職：流浪者主勝追多鋪

近年對賽佔盡上風
周五澳職賽事，西悉尼流浪者主場鬥西部聯。西悉尼流浪者上輪喺「悉尼打吡」慘敗，依家跌落季後賽邊緣嘅第6位，想保住季後賽資格不容再失，今仗對住包尾嘅西部聯，相信會知恥近乎勇，加上近年交手都剋住西部聯，今場主勝可放心捧場。

（無綫myTV聽SUPER周五下午4時45分直播）
西悉尼流浪者近期傷兵眾多影響表現，不過隨住前鋒班頓波里路等主將傷愈，狀態逐步提升，相信成績亦會慢慢改善，主場出擊要踢爭氣波，戰意唔使懷疑。

西部聯作客腳軟
西部聯上場贏珀斯光輝，但聯賽仍然排包尾，入季後賽機會渺茫，佢哋作客成績慘不忍睹，近9場作客只得2和7負，而且兩軍近3次對賽，西悉尼流浪者全部贏晒，今仗一於追主勝。