西乙：惡客艾爾切反轉利雲特

今晚西乙焦點賽事，利雲特主場鬥艾爾切。兩隊近兩年都曾經喺西甲出現，利雲特喺2022年降班，艾爾切就上年跌落乙組，今季以重返西甲為目標。論實力同狀態艾爾切無疑佔優，有望反客為主，平手盤值博。（周一凌晨1時30分開賽）

利雲特上季喺升班附加賽決賽飲恨，重返西甲只差一步，但佢哋今季愈踢愈頹，對上9場聯賽只係贏過1場，9場夾埋入得6球，火力極度疲弱，依家只排第11位，已經被前列球隊愈拋愈遠，球員信心唔慌好。

尼高拉斯卡斯杜腳風順
艾爾切今季保留多位西甲戰將，落到乙組夠資格「蝦蝦霸霸」，近4場聯賽全勝，佢哋防守硬淨，作客成績醒神，單計作客近5場錄得4勝，呢4場全部冇失球，中場尼高拉斯卡斯杜當中3場入波奠勝，今晚遇上利雲特又係數胡好時機。