歐霸盃：主場出擊特別硬淨 羅馬受讓有利可圖

歐霸盃4強首回合，羅馬主場迎戰利華古遜，雙方曾於上屆4強交鋒，當時羅馬憑主場贏波淘汰對方，打入決賽。呢支意甲勁旅今年1月中由迪羅斯執教後，發揮穩定，加上近6次歐霸盃主場出擊，法定時間取得5勝1和，今場仲有得受讓，讓球主勝值博。（Now 643周五凌晨3時直播）

羅馬上屆歐霸盃喺摩連奴執教之下，4強對利華古遜，首回合主場贏1比0，次回合作客守和0比0，進身決賽。雖然「寸王」已經被炒，但少帥迪羅斯接手領軍，球隊發揮更出色，進入歐霸盃淘汰賽，6戰僅1敗，而且該場敗仗好大程度上因為16強首回合已經領先白禮頓4球，次回合出副選先至輸波，並冇參考價值。事實上，羅馬8強出真功夫，兩回合「雙殺」意甲第2位嘅AC米蘭，盡顯霸氣，今仗有地利，坐和望贏。

利華捧完德甲跌Watt
另邊廂，利華古遜早前提早奪得德甲冠軍之後，球隊爭勝饑渴感有所下降，包括歐霸盃8強次回合作客韋斯咸，戰至比賽末段先至逼和1比1，其後聯賽對多蒙特及史特加，同樣先落後下踢到補時扳平，換言之已經連續3場比賽和波，今仗造訪意大利，恐怕勝算更加低，讓唔起羅馬。