周中先踢完熱身賽嘅波蘭，話咁快今晚又同芬蘭「拍跳」，呢支東歐球隊為嚟緊今夏歐國盃備戰相當積極，隊長「羅拔仔」羅拔利雲度夫斯基上仗冇士哥，今仗必定加多兩錢肉緊，博攞印象分，相反芬蘭只係純粹陪練，唔使旨意佢哋會搏命，加上近3仗於上半場已經落後，不妨捧波蘭半場勝。
（TVB 302周日凌晨零時30分直播）
波蘭自1982年世盃獲得季軍後，三十多年來一係入唔到大賽決賽周，一係就做陪跑，但隨住隊長羅拔利雲度夫斯基嘅冒起，成為歐洲球壇聞風喪膽嘅射手後，波蘭亦逐漸復甦。自前年歐國外展開後波蘭持續托弗，順利獲得今夏歐國盃決賽周入場券，「羅拔仔」更以13個入波榮膺歐國外神射手，單計佢近6次為國披甲就轟入8粒。不過波蘭周中熱身賽以1比0擊敗塞爾維亞，「羅拔仔」就冇士哥，仲喺下半場中段被換出，雖然明顯係為備戰歐國盃試陣，但「羅拔仔」點都唔想再失威，今仗必定搏甩髀。
芬蘭Hea踢交差波
芬蘭積弱多年，自希比亞同列馬倫之後，搵個噏得出名的球星都冇，歐國盃決賽周當然冇佢哋份，今輪國際賽期完全係踢交差波，你想佢哋搏老命爭勝都幾難。連歐國外在內，芬蘭近8仗只錄得2勝2和4負，所贏嗰兩仗只係弱旅法羅群島同出線無望嘅希臘，Hea到冇朋友。
睇番芬蘭近3仗兩敗全開半場輸，與近4仗全勝、3開半場勝嘅波蘭對比，可謂高下立見，波蘭今仗隨時速戰速決，半場主勝值得捧場。