英超嚟到最後大直路，多支球隊都好鬼忙碌，有啲忙緊護級，喺生死邊緣掙扎求存；有啲忙緊搶分爭標，每場都不容有失；有啲就忙緊爭歐聯入場券，一分都不能少。今晚熱刺迎戰曼聯，一隊要搶分追趕李斯特城，一隊要爭入前四，，本來激戰可期，可惜熱刺近況回落，相信主場出擊都唔敢搶攻，先睇定形勢再諗計爭勝，加埋紅魔火力唔夠勁，相信今晚唔慌多波入，1.72倍嘅入球細絕對係明智之選。
（now621周日晚11時直播）
熱刺今季演出相當穩定，開季至今32戰射入57球、只失25球，無論進攻同防守能力都係20支英超球隊當中最強。當中主力射手哈利卡尼仲啱啱當選3月份英超最佳球員，呢名英格蘭國腳喺3月總共取得6個「士哥」，今季聯賽已經累積攻入22球，成為熱刺史上單季英超入波最多嘅球員之餘，依家仲喺射手榜以3球領先李斯特城箭頭占美華迪添！
熱刺靠防反搵食
可惜吖，踢波唔係靠一個人就掂檔，熱刺最近表現有啲回落，上場造訪利物浦只能夠打和1比1，痛失2分，慘被「一哥」李斯特城拋離7分，爭標形勢大受影響，而且佢哋最近對住下游球隊般尼茅夫同阿士東維拉至保持不失，季中嘅霸氣削弱咗唔少！熱刺要奪標嘅話，餘下6場比賽1分都唔失得，相信領隊普捷天奴今晚會落「柯打」，叫班球員穩陣為先，搶攻場面唔慌多得去邊。
紅魔火力唔夠勁
至於曼聯近期表現終於有番啲起色喇，繼曼市打吡擊敗曼城後，上場又喺主場擊敗愛華頓，現時只落後第4位嘅曼城1分，有望爭入前四攞下屆歐聯入場券。弊在紅魔鋒力始終唔夠勁，近4場聯賽夾埋只係入得3粒咁大把。加上如果佢哋要爭入前四，餘下賽事唔可以有咩差池，所以相信佢哋今晚會同熱刺一樣，採取穩守突擊戰術，預料會係悶戰一場，1.72倍「細」係信心之選。