熱刺On Fire爆紅軍
國際賽檔期過後，「三獅兵團」成員各自都返去所屬嘅英超球會，準備一連兩晚嘅英超賽事。今晚嘅焦點大戰一定係壓軸登場嘅利物浦同熱刺啦，兩隊都係英格蘭廿三人大軍當中嘅大戶，各自有五位球員被領隊鶴臣徵召入伍，但風頭就畀熱刺四大才子搶晒啦！哈利卡尼、艾歷迪亞、丹尼路斯同埋新星迪利阿里狀態大勇，尤其喺作客德國嘅賽事當中表現相當搶眼，帶領球隊反敗為勝！今晚弗到漏嘅熱刺作客對狀態麻麻嘅「紅軍」利物浦，讓球盤熱刺受讓平半，1.79倍嘅下盤絕對值得支持！
（now 621周日凌晨零時30分直播）
熱刺近排士氣高昂，皆因英格蘭嘅正選名單當中，有四位熱刺球員，創下球隊為英格蘭國家隊正選出場嘅人數記錄！咁都未算威呀，熱刺四子喺對德國嘅賽事表現出色，仲獲得外界一致好評添！雖然迪利阿里對住空門射高，錯失黃金機會，但佢嘅中場拍檔艾歷迪亞喺補時階段頂入致勝球，而首席射手哈利卡尼用後腳轉身呃晒兩個德國後衞取得「士哥」，協助球隊反cup成功！而喺聯賽方面，卡尼仔入球同樣停不了！由開季至今，佢已經取得廿一個聯賽入球，追平咗上季個人入波紀錄，喺射手榜暫排no.1，仲成為第五個連續兩季喺英超聯賽射入二十球或以上嘅英軍前鋒，認真厲害！
熱刺除咗鋒力冠絕英超之外，就連失球數字都係20支球隊中最少，既攻得又守得。佢哋依家同榜首嘅李斯特城相差五分，餘下七場聯賽，相信佢哋必定會On Fire搶分！
利物浦狀態決心遜一籌
另邊廂，暫時喺積分榜第九位嘅利物浦同前四相差七分，要搶奪歐聯席位並唔樂觀。領隊高普趁住復活節假期兼國際賽期間，帶埋成班唔使回歸國家隊嘅球員同屋企人去西班牙叉叉電，仲利用當地嘅溫暖天氣操練，簡直係一舉兩得！人腳方面，羅拔圖法明奴因傷而缺席國際賽，而賓迪基亦喺國家隊集訓中途退隊，就算今晚趕及復出都未必有態，盧卡斯就繼續養傷。論決心同狀態都處下風。