西班牙國家打吡今晚深夜爆發，巴塞隆拿主場鬥皇家馬德里！「地上最強」喺榜首遙遙領先，冠軍十拿九穩，唔需要太進取，尤其係「MSN」美斯、蘇亞雷斯、尼馬剛為國出征，飽受舟車勞頓之苦，加上將喺下周中歐聯硬撼馬體會，難免有顧忌，未必搏盡。至於皇馬已落後十分，爭標重心轉移至歐聯，今仗同樣會有保留。入球大細中位數為3.5球，寧揀1.8倍入球細。
（now632周日凌晨2時30分直播）
榜首巴塞分別領先次席馬體會、第三位嘅皇馬九分及十分，衞冕成功機會高唱入雲，餘下目標直指西班牙盃及歐聯錦標，力爭再次成為三冠王。「地上最強」要達成美夢，好考教練安歷基兵力分配，既然聯賽戰線大局已定，毋須再投放太大力量搶分，今仗唔輸已收貨。
阿蘇國際賽喪飛2.8萬公里
值得留意，巴塞多南美兵，陣中所有國腳今次國際賽總共飛咗近19萬公里，比皇馬國腳多10萬公里，淨係阿蘇都飛咗2.8萬公里，而且美斯同阿蘇都為國家隊踢足兩場激戰，隨時回唔切氣腳仔軟。同埋巴塞將喺下周三凌晨歐聯8強首回合主場鬥馬體會，若稍有閃失，衞冕希望隨時化為泡影。講重要性，對馬體會一役，明顯高過今場對皇馬，更令人懷疑，巴塞會留有一手。
C朗腳風曳 齋識恰弱旅
至於皇馬亦會喺下周四凌晨歐聯8強首回合作客禾夫斯堡，教練施丹早已講明聯賽爭標無望，會全力爭歐聯，估計唔會浪費太多精神喺巴塞身上，否則一旦連歐聯都冇埋，搞到四大皆空，就喊都無謂。C朗腳風唔順，連接喺西甲對西維爾，以及熱身賽對保加利亞射失12碼。雖然呢位葡萄牙巨星排射手榜榜首，但主要喺弱隊身上入波，今季聯賽兩鬥馬體會，同埋首循環對巴塞，都食白果，唔好對佢抱有太大期望，入球細啱數。