兩支日職球隊浦和紅鑽同廣島三箭，由於下周中要踢亞冠盃分組賽，所以本土賽事提早喺今日進行，其中紅鑽會喺主場迎戰甲府風林。紅鑽名氣雖然勝過風林，但近年喺對賽往績上都冇明顯優勢，其中三次主場出擊都打成和局。風林早前喺日聯盃分組賽先後贏過鹿島鹿角同打和大宮松鼠，雖然陣內有唔少傷兵，但今仗作客有力半場守住對手，阿King推介半場和。
（有線61及201台周五晚上6時30分直播）
紅鑽陣中有唔少日本國腳踢完「太公波」，包括前鋒柏木陽介、後衞槙野智章同門將西川周作，雖然佢哋冇傷兵問題，但下周中嘅亞冠盃分組賽要喺主場迎戰ＦＣ廣州，今仗未必會全力以赴。相反風林今仗雖有中場石原克哉、後衞柴村直彌同土屋征夫因傷缺陣，但呢班波近期作客表現穩健，再加上近四次造訪紅鑽都開出半場和，呢場被日本媒體喻為「矛盾對決」嘅硬仗，阿King捧半場和。
三箭遇維加泰捧細盤
至於三箭主場對仙台維加泰嘅賽事，三箭有後衞佐佐木翔養傷、中場「森崎兄弟」森崎和幸同森崎浩司啱啱復操應該唔會上陣，另一中場野津田岳人更被外借新潟天鵝，今仗對住近六仗有四場冇失波嘅維加泰，就算贏都唔慌出現大比數，一於捧細盤。
挪超嘅利尼史特朗上季打破每對莫迪輸多贏少嘅局面，今季雖然仲未開齋，但連同友賽近4次作客錄得兩勝兩和嘅成績，有條件作客搶到一分，捧讓球客勝。