歐霸盃8強首回合重頭戲今夜上演，由德甲嘅多蒙特主場對英超嘅利物浦。「蜜蜂兵團」防線喺主場滴水不漏，面對喺歐洲賽作客踢得非常保守嘅利物浦，細盤有2.1倍值得支持。
（now 670周五凌晨3時05分直播）
多蒙特幾名攻擊球員好似奧巴美揚、馬高列奧斯、香川真司同米希達利恩都有唔錯嘅入球能力。不過，歐霸盃始終係踢兩回合，「蜜蜂兵團」除咗要力爭贏波外，更要慎防被「紅軍」攞到作客入球。多蒙特近8仗主場賽事有6場保住清白之身，以利物浦唔算銳利嘅攻擊力，要喺「蜜蜂兵團」身上攞到入球絕非易事。
高普回家講明守
今仗焦點係「高普回家」！利物浦主帥高普倒戈面對舊會，賽前表示雖然並非百分百瞭解今日嘅多蒙特，但都有98％，可見佢對應付舊東家甚有信心。高普指多蒙特火力強勁，今仗會先做好防務工作力保不失。事實上，利物浦亦冇強攻嘅本錢，前鋒賓迪基正在養傷，羅拔圖法明奴就啱啱好返，菲臘比古天奴上次國際賽周又要飛返南美比賽，兩人狀態成疑下單靠史杜列治恐怕難有作為。況且「紅軍」應付歐霸盃作客賽事向來以穩守為先，今屆客戰開細盤比率高達100%。