鄭大世終於康復，降落日乙之後未見有太大起色嘅清水心跳，今日作客對住傷兵滿營嘅山形山神，始終佔有質素優勢，小讓平半唔過分，一於博清水2.21倍上盤。
（開賽時間：周六中午12:00）
鄭大世復出打多瓣高波
由日職降落日乙，人腳變動唔算大太，清水一直畀人視為升班席位有力角逐者之一，但係鋒將鄭大世、中場白崎凌兵養傷，一定程度上削弱咗佢哋嘅攻擊力，上仗主場0:2輸畀北海道札幌岡薩多，清水就畀傳媒批評進攻單調，後防又唔穩陣。依家好嘞，鄭大世、白崎都好番晒，尤其身高1米81嘅鄭大世，可以令清水打多瓣高波，應該改善到佢哋4戰有3場冇波入嘅問題。雖則清水後衞迪贊積高域奉召幫加拿大踢國際賽，今日冇法子幫拖，但以山形嘅4場入3球攻擊力，清水唔會咁易出事。
山形殘陣開季4戰不勝
清水稍為秤先嘅另一個原因，在於山形開季4戰不勝之餘，又突然湧現傷兵潮，後衞石川龍也，中場佐藤優平，鈴木雄斗3件主將缺陣，加埋比嘉厚平早就摺埋，令到山形要起用養傷接近半年嘅松岡亮輔打中場，攻守連繫點都會差啲。何況山形往績亦好曳，過去6次响ND體育場迎戰清水，只得1勝2和3負，至攞命係除咗兩場日聯盃取得1勝1和，其他4場聯賽係1和3負，即係話清水只會响盃賽益吓山形，到咗聯賽就完全無情講，今日山形就算主場受讓都冇着數。