艾歷臣+中國美斯夠照
亞冠盃兩支中超豪門，上海SP（上海上港）、FC江蘇（江蘇蘇寧易購）今日分途出擊！G組由瑞典名帥艾歷臣執教嘅上海SP作客日職球隊大阪飛腳，上海SP投入大量資金增兵，果然取得佳績，3戰取得2勝1負排榜首，包括上月主場以2比1擊敗飛腳，就算今仗作客都未驚過，而且仲有得受讓，必捧上海SP1.69倍讓球客勝。
（now672周三晚6時直播）
艾歷臣以往教過拉素、英格蘭國家隊、曼城等勁旅，大賽經驗喺亞冠超班。最重要係佢手上擁有一批猛將，巴西前鋒艾傑臣、阿根廷中場孔卡曾經為FC廣州捧過亞冠盃，中場武磊、于海、蔡慧康、後衞王燊超及門將顏駿凌都有份入選剛喺世盃外擊敗卡塔爾嘅中國大軍名單，有「中國美斯」之稱嘅武磊更係入球功臣之一，陣容強大。上海SP重金招攬名帥名將，最大目標都係希望成為第2支FC廣州，一嘗亞冠盃盟主滋味，鬥心肯定旺盛。
大阪飛腳流血未止
大阪飛腳狀態低迷，首循環輸畀上海SP之後，返到日職再輸兩場，換言之球隊已經3連敗。事實上，飛腳今屆亞冠盃3戰仍然未贏過，表現令人失望，今仗讓波未免太被高估，捧對家啱數。
江蘇鬥東京吼半和
E組亦上演「中日對決」，FC江蘇主場鬥FC東京，FC江蘇今季簽入3位巴西球星阿歷士泰斯拿、拉美利斯、祖奧，聲勢浩大。不過，呢支「富豪兵團」踢亞冠唔算突出，3戰只得1勝2和，僅入4球，上月作客FC東京更悶和0比0。FC東京雖然星味唔及對手，但踢法好硬淨，近5仗上半場都和波，FC江蘇想攻入佢哋大門並非易事，再追半場和。
（now670周三晚8時直播）