3戰得2分焗攻紅鑽
亞冠盃H組，上屆冠軍FC廣州（廣州恒大淘寶）3戰仍然未贏波，出線前景危在旦夕，今輪作客日職球隊浦和紅鑽，焗攻求勝。浦和紅鑽狀態大勇，近4場比賽，每場起碼入兩粒，佔有地利，更加唔怕同FC廣州駁火，首選入球大。
（now 671周二晚6時30分直播）
FC廣州3場分組賽僅獲兩分排包尾，除咗落後榜首FC悉尼4分，亦比紅鑽及浦項制鐵少2分，再唔急起直追，好可能出局，對於呢支中超豪門無疑係一大恥辱。會方近日發布亞冠盃海報，大大隻字寫住「沉默中爆發」，配合火山爆發背景，擺明要豁出去一戰，爭取打開勝利之門。
雖然FC廣州貴價射手積臣馬天尼斯今季加盟後，表現一般，但巴西前鋒列卡度高拉特仍然保持水準，上月首循環主場鬥紅鑽，佢梅開二度，幫球隊一度領先兩球，可惜最終被逼和2比2，今仗再接再厲，可望再有斬獲。
浦和紅鑽3戰有4分，出線唔穩陣，今仗定必想一舉擊敗陷入低潮嘅FC廣州。紅鑽前鋒隆比真歷、興梠慎三、武藤雄樹都具一定級數，特別係興梠慎三腳風順，上次作客廣州射入扳平一球，近3場日職更加轟入4球，銳不可當，今仗又係佢表演時候。即使另一位前鋒石原直樹坐波監，仍然夠殺。
恒大6,000球迷入場打氣
今場大戰肯定爆滿，上星期售出25,000張飛，理論上浦和佔盡地利人和，社長淵田敬三依然公開呼籲Fans全力打氣：「我哋要靠你哋嘅力量！」因為廣州今次訂咗成6,000張飛，比起浦和平時配給畀客隊嘅數目多成倍，聲勢一啲都唔弱。
另外，兩隊近3次交手，都開入球大，而且FC廣州近年亞冠盃作客日職球隊亦經常出現大手交易，近7次訪日一共和對手炮製25個士哥，其中5次總入球達3球或以上，入球大值得追捧。