今晚國際賽重頭戲，德國主場迎戰世仇英格蘭，可惜目前兩軍正面對種種問題困擾，令這場大戰少了過往的激情。德國自從捧完2014年世界盃冠軍之後，表現走下坡，攻力亦冇以往咁銳利，加上熱身賽場合更加不宜高估。至於英格蘭人腳不整，過往亦一直被德國食住，作客柏林睇怕亦係難有作為。最關鍵係雙方以試陣為主，唔會去盡，揀入球細最上算。
（無綫翡翠台、TVB13周日凌晨3時45分直播）
世盃冠軍 鋒力不濟
德國兩年前奪得世界盃冠軍後，好似失去奮鬥目標，歐國盃外圍賽首3仗僅1勝，一度備受批評，最後踢完10場比賽入24球，比4年前外圍賽少10球，亦比上屆世界盃外圍賽少12球，攻力明顯減弱。踢「太公波」表現仲差，近5仗熱身賽只得1勝，最近1仗係上年11月淨吞法國兩蛋，冇晒傳統「日耳曼兵團」嘅鬥心。
德國目前面對最大的問題係鋒線人才凋零，今次仲要徵召高峰期已過嘅馬里奧高美斯同普多斯基。德國愈來愈依賴湯馬士梅拿、馬高列奧斯入波，並非好事。
至於英格蘭雖然近7仗熱身賽取得3勝3和1負，但英軍以往每鬥德國都處於下風，雙方近4次對壘，英格蘭輸咗3次，包括最近1次於2013年熱身賽主場輸0比1。更何況英格蘭近期出現傷兵潮，前鋒朗尼、中場史達寧、阿歷士張伯倫、戴爾夫及門將赫特皆因傷未有入選，相信領隊鶴臣今仗應會避重就輕，要求球員就住踢，以免再有球員受傷。
鶴臣保守 遇強必縮
事實上，鶴臣作風保守，遇強隊更加會穩陣行先，近7仗熱身賽6次開細，特別面對傳統勁旅鮮有大手交易，例如近兩仗對西班牙及法國，都係分別只有2球交收，今場鬥級數接近嘅德國，戰況料分別不大，追細好路。