穩陣行先悶暈斯洛文尼亞
今晚熱身賽戲碼麻麻，但直播場次北愛爾蘭主場對斯洛文尼亞值得留意。史上首度殺入歐國盃決賽周嘅北愛，為把握練兵機會唔會hea，但佢哋一向打「擦鞋仔波」，無論對邊隊都穩陣行先，近8仗6開半場和，今仗撞正進攻唔掂嘅斯洛文尼亞，初段鬥拉布實悶到發慌，一於再捧半場和。
（TVB 302周二凌晨2時45分直播）
由於今夏有歐國盃決賽周，各支入圍球隊都會把握今輪國際賽期練兵，而首次參加決賽周嘅北愛亦唔例外，不過齋睇牌面，伯明翰前鋒拉菲迪、修咸頓中場史堤芬戴維斯已經係佢哋最出名嘅球員，而且冇優質前鋒下，惟有打「擦鞋仔波」做好防守先。單計近8仗，北愛雖然入得11球唔算多，但憑住只失6球嘅穩健防線，取得3勝5和未輸過成績，當中有6仗上半場同對手打和，可見佢哋初段唔敢冒進嘅特性。
另一邊廂，實力較強嘅斯洛文尼亞無緣歐國盃，今仗純粹陪練唔慌搏命，況且佢哋都係守強攻弱球隊，近6仗只入6球，但僅失4粒，可見以國米門神漢丹洛域為首嘅防線固若金湯，同時亦反映出佢哋不擅主攻，造訪防守大過天嘅北愛隨時悶到暈，加上兩軍近4次碰頭全開半場和，仲要係0比0嗰隻，值得再追。
威爾斯缺雙星獻「細」
至於另一早少少開波嘅熱身賽，由兩支殺入歐國盃嘅球隊交手，就係烏克蘭主場對威爾斯，威爾斯兩大icon人物加里夫巴利及艾朗藍斯，一個啱啱好番，另一個仲養緊傷所以未獲徵召，係人都知威軍靠佢哋數胡，同時缺陣令實力大削。烏克蘭有效力西維爾嘅好波之人高路比恩卡壓陣，睇落好似秤先啲，但從日前同弱旅塞浦路斯「拍跳」小勝1比0，可見佢哋攻力疲弱問題未有改善，今仗唔慌多波入，不妨捧細盤。
（周二凌晨2時開賽）