西班牙球星留力聯賽
上仗作客同意大利打和1:1嘅西班牙，今晚又要飛去東歐，同羅馬尼亞踢熱身賽。從牌面上睇，「狂牛軍團」實力難免被人睇高一線，之不過佢哋陣中一班星級球員仲要為球會季尾賽事衝刺，加上「西班牙國家打吡」舉行在即，怕且班球員都會留有一手。考慮到羅馬尼亞防守力唔曳，連續8場比賽半場未曾失守，相信呢鋪有力頂住半場不敗，2.05倍半場和唔怕追。
（TVB302周一凌晨2:45直播）
無可否認，西班牙狀態係唔差，連續7場比賽不敗之餘，兼未試過喺上半場畀對手射入。咁係因為同佢哋採用控球至上嘅踢法有關，對方連想搶個波都難，更唔好話要威脅佢哋大門。但值得留意嘅係，「狂牛軍團」陣中有唔少效力歐洲豪門嘅球員，嚟到季尾搏殺期，佢哋仲會唔會為咗呢啲太公波搏命先？
羅馬尼亞成年未試過半場失波
咪忘記巴塞主場惡戰皇馬嘅「西班牙國家打吡」，將於嚟緊呢輪西甲舉行，緊隨其後就連馬體會在內，西甲3雄又話要備戰歐聯8強賽事，計落呢3隊球員喺今場無關痛癢嘅比賽度留一手，都係人之常情啫。
更何況就算西班牙強攻，想攻破羅馬尼亞大門都唔易囉。事關呢支東歐球隊喺今屆歐國盃外圍賽F組，10仗夾埋只係失得2球，係外圍賽中失球最少嘅隊伍，防守力係有保證。再睇埋班波最近表現，佢哋近8場熱身賽不但試過同意大利不分勝負。更誇張嘅係，班波對上1年嗰8場比賽，從未試過喺換邊前失波！呢鋪佢哋對住名氣、實力都喺自己之上嘅「狂牛軍團」，只會更專心做好防守。以羅馬尼亞呢排咁理想嘅表現，西班牙就算想入波怕且都要等到下半場先有機咯。