周五澳職獨腳戲，榜首西悉尼流浪者作客鬥墨爾本勝利。勝利下半季因兼顧亞冠盃搞到狀態大跌Watt，由原本爭標分子淪為要「掹車邊」力爭季後賽資格，目前澳職榜首4強之間只有2分差距，西悉流為爭常規賽冠軍1分都不能少，難得西悉流仲有得受讓平半，下盤必捧。
（有線64及203台周五下午4時40分直播）
澳職常規賽剩餘最後3輪，排第6嘅墨爾本勝利只比第7位嘅ＦＣ悉尼多3分，仲未穩入季後賽，不過佢哋近兩個月狀態唔多掂，近8場聯賽只係贏過包尾嘅中岸水手，尤其自從亞冠盃分組賽開打後，球員表現明顯有疲態，主場出擊都冇優勢。兩大球星巴巴路西斯及古希美日前證實下季將會過檔威靈頓鳳凰，或多或少對士氣有影響，守將謝利亞入選澳洲國家隊出戰世盃外圍賽而缺陣，更加畀唔到人信心。
爭常規賽冠軍必摶
西悉尼流浪者上周0比0打和阿德萊德聯，並乘着布里斯班獅吼輸畀墨爾本城進佔榜首，不過依家佢哋只係領先第4位嘅阿聯2分，一旦失分有機會連跌幾級，戰意必高。今次係雙方今季喺常規賽第3次交手，西悉流對上2次取得1勝1和，往績佔上風，今場仲有得受讓平半，梗係捧下盤喇！