英超榜首李斯特城主場對修咸頓，「狐狸」李斯特城餘下7輪聯賽，全力衝刺，誓要創造捧盃奇迹，射手占美華迪剛連續2場熱身賽為英格蘭入波，信心大增。不過門將卡斯柏舒米高有傷上陣成疑，防線有隱憂。「聖人」修咸頓回勇，更有力爭前四，相信會豁出一搏，首選2.15倍入球大。（now 621周日晚8時30分直播）
占美華迪早前5場英超食白果，搞到「狐狸」近3仗都只係小勝收場。幸好呢位前鋒喺國家隊大發神威，連續兩場建功，佢重拾射門觸覺對「狐狸」最後衝冠路途非常重要，加上近期頻有斬獲嘅拍檔馬列斯及岡崎慎司，李斯特城要入波唔成問題。不過卡斯柏舒米高受傷患困擾，如果冇咗呢位鋼門把關，恐怕難保清白之身。
修咸頓全力搏盡爭前四
修咸頓亦錄得兩連勝，上仗落後兩球劣勢下反勝利物浦3比2，鬥志非常頑強。未計昨晚賽事，「聖人」僅落後第4位曼城4分，但踢多一場，牌面上仲有機會打入前四參加下屆歐聯，幾大都搏盡。前鋒加斯安奴柏利近兩仗射入3球，勢必對李斯特城防線構成重大威脅，但修咸頓防守麻麻，近5仗都有失球，睇怕阻唔到占美華迪同馬列斯入波，最好捧入球大。