今晚熱身賽有重頭戲上演，由荷蘭主場惡戰法國。「橙衫軍團」自從喺歐國盃外圍賽出局後引入更多年輕球員重建隊波，今仗面對近期表現勇猛嘅法國，怕且班荷蘭小將都要交吓學費先得，捧2倍客勝。
（開賽時間：周六凌晨3:45）
荷蘭上年喺歐國盃外圍賽A組，竟然畀一眾歐洲二線球隊捷克、冰島同土耳其壓住，結果佢哋連附加賽資格都攞唔到，直接宣布出局，認真醜怪。嚟緊荷蘭要盡快重建好球隊，以免重蹈覆轍，如果唔係連下屆世盃決賽周席位都不保喎。
法國基沙文 普巴攻堅火力勁
睇番「橙衫軍團」今次大軍名單，佢哋只得前鋒亨特拉爾、中場史奈達、後備門將華美亞年過30，3大鋒將洛賓、尹佩斯、巴斯杜斯都冇入選，火力得番幾多實屬疑問。更何況呢班波只得1名正式右閘，仲係要從未喺國際賽落過場嘅飛燕諾守將卡斯杜柏嚟添，呢鋪擺到明試陣培訓新血，咁搞法真係揀唔落手咯。
另邊廂嘅法國為認真備戰歐國盃，可謂精銳盡出，前鋒基沙文、中場保羅普巴、守將哥斯尼均可候命。況且隊波表現穩定，近6戰取得5勝1負成績，手下敗將包括德國、葡萄牙等名牌球隊，既然對手呢鋪試陣為主，相信一眾法國國腳都會把握機會騷哥利，入多2粒爭得主帥迪甘斯歡心啫。