澳職常規賽鬥入最後直路！今日有場墨爾本勝利主場迎戰西悉尼流浪者嘅王者大戰。墨爾本勝利雖然係上季澳職盟主，不過近2個月狀態真係唔多掂，至於作客嘅西悉尼流浪者為保住「一哥」優勢，賽前特別進行進攻特訓，一於撐2.55倍客勝。
（有線64及203周五下午4:40直播）
墨爾本勝利季初霸氣近2個月完全冇晒，成隊波似乎散散哋，2大外援球星巴巴路西斯同古希美，日前證實下季過檔威靈頓鳳凰，對於呢支排緊「梗頸六」嘅球隊嚟講，士氣肯定受到極大打擊。更何況後防謝利亞要為澳洲國家隊服刑，今場真係好難畀到球迷信心囉。
西悉尼流浪者目前以1分領先墨爾本城同布里斯班獅吼排榜首，要拎冠軍絕對唔可以輕易失分，好在佢哋近2仗1勝1和拎到4分，狀態算係唔錯，查實佢哋2場都佔盡上風，只係合共31次埋門僅入1球。唔怪得西悉尼流浪者喺今場賽前特別加強球員進攻訓練，希望增加入球效率，以佢哋嘅決心同實力，作客贏波都唔係問題。