世盃外南美洲區周五早上爆發超強激戰，智利主場迎戰阿根廷，今場係上年美洲國家盃決賽翻版，當時智利憑主場之利成功封殺美斯，最後仲憑互射12碼擊敗對手捧盃，今次於同一福地再戰，智利有力再做攔路虎。兩軍近7次交手有5次開細，入球細1.57倍勝在夠穩陣，值得再追。
（周五早上7時30分開賽）
美洲盃決賽碰頭互交白卷
阿根廷向來係南美洲區風頭躉，但今屆世盃外開得項唔順，頭4場分組賽只得1勝，暫時得5分排第6位，佢哋戰績咁曳好大程度同王牌美斯因傷缺席頭4仗比賽有關，今場美斯終於傷愈歸隊，戰鬥力自然有所提升。不過有美斯都唔代表佢哋一定贏到智利，事關上年美洲國家盃決賽，阿根廷同樣有美斯、阿古路及迪馬利亞等主力壓陣，都咬唔入智利，結果踢足120分鐘打和0比0，最後仲射輸埋12碼，今仗就算強陣出擊亦冇優勢可言。
智利頭兩場主戰俱開細
智利贏完美洲國家盃後已正式「升呢」，而且主場出擊繼續保持強勢，今屆世盃外頭兩場主場分組賽保持不敗，分別以2比0擊敗另一勁旅巴西及1比1打和哥倫比亞，無獨有偶都係開細盤，表現夠晒硬淨。前鋒阿歷斯山齊士、中場維達爾、守衞加利美度及門將哥迪奧巴禾目前仲係隊中三線主力核心，既然上次可以成功「冰封」美斯，今次自然可以照辦煮碗。兩軍過去7次交手有5次開細盤，預計今仗入波亦唔會多，1.57倍細盤可再追。