守強攻弱鬥踢悶蛋波
今個國際賽期大戰連場，一眾歐洲勁旅為備戰夏天嘅歐國盃決賽周，齊齊約戰練兵，今晚最矚目戲碼非意大利主場惡鬥西班牙莫屬。「狂牛軍團」以控傳踢法聞名，不過自從韋拿、費托離開國家隊後，球隊一直缺少一位頂級射手，主隊意大利同樣係守強攻弱，今仗開1.57倍入球細機會極高。
（開賽時間：周五凌晨3:45）
西班牙早年擁有韋拿、費蘭度托利斯呢啲高質射手，佢哋冇踢國家隊後，車路士前鋒迪亞高哥斯達本來係射術最好嘅一個，可惜因為紀律問題被放棄，前線夠卡士壓陣嘅球員買少見少，無論係祖雲達斯箭頭艾華路莫拉達定係華倫西亞小將柏高艾卡沙，都缺乏國際賽經驗，難予人信心，加上恩尼斯達、布斯基斯同辛迪卡索拉呢啲有一定質素嘅球星因傷冇入隊，策劃攻勢能力唔打折扣就奇。
加斯安奴柏利孭唔到飛
睇番「狂牛軍團」早前8場國際賽當中，就有6仗開出「入球細」，客場出擊更加連續4場開細，咁好路，今場值得再追。
意大利同樣面對鋒力不足嘅問題，睇番今次大軍名單，AC米蘭前鋒巴洛迪利再次落選，巴黎聖日耳門中場馬高華拉堤因傷已退隊，喺國際賽入波數目最多嘅球員，竟然係名氣一般嘅修咸頓射手加斯安奴柏利，佢都只係為國家隊貢獻咗4個入波咋，真係好難對佢哋嘅攻擊力有太大期望。考慮到雙方近4次對碰3次開細盤，入球細值得吼實！