主力避戰志在試陣
今晚國際熱身賽上演上屆歐國盃決賽翻版，意大利主場對西班牙，但要留意，兩軍今次同樣缺少多名主力，試陣味甚濃，加上聯賽、歐戰進入爭標大直路，球星們踢太公波難免會比較錫身，以免受傷影響球會成績。預料兩隊都會點到即止，入波唔慌多，首選入球細。
（周五凌晨3時45分開賽）
意大利領隊干地將於今屆歐國盃後離任，佢今次熱身賽大膽棄用多位老臣，派路、迪羅斯、馬治斯奧、基亞連尼、巴沙利都冇份入選，巴黎聖日耳門嘅「新派路」馬高華拉堤因傷退隊。取而代之係兩位「90後」新星貝拿迪斯治、佐真奴費路首次入選，可見干地志在揀蟀，觀察一眾邊緣國腳表現，勝負只屬其次。
意軍啞火 鬥牛國輸送差
另外，意大利鋒線近年人才凋零，搞到要搵巴西裔射手艾達馬田斯歸化助陣，但佢自1月轉投國際米蘭後死晒火，仲未入波。至於艾沙拉維、加斯安奴柏利、施蒙尼沙薩以往踢國家隊表現都麻麻。唯一安慰係防線仲有鋼門保方鎮守，應該可以保住後方！
西班牙主帥迪保斯基亦冇徵召車路士射手迪亞高哥斯達，相信祖記前鋒艾華路莫拉達會擔正，但中場恩尼斯達、布斯基斯、辛迪卡索拉都因傷缺陣，難免削弱組織力，令鋒線得唔到足夠供應。事實上，「鬥牛兵團」近年火力下降，雖然近8場比賽7勝，但有6場開細。加上西班牙過去10次對意大利有8次開細，細盤值得再追。