今晚德乙有場獨腳戲，由仲有機會爭冠軍嘅弗賴堡，主場迎戰中游球隊卡爾斯魯厄。弗賴堡今季喺德乙火力勁猛，佢哋最近連贏5場狀態大勇，呢次對住升班冇望但又唔愁降班嘅卡爾斯魯厄，主帥卡奧辛斯基肯定落柯打要全取3分，今仗弗賴堡讓半一，2.03倍上盤依然抵玩。
（開賽時間：周二凌晨3:15）
卡爾斯魯厄冇嘢好爭
今輪聯賽未開始之前，排第2位嘅弗賴堡只係差榜首RB萊比錫3分，換言之佢哋爭冠一事仲有希望，今仗一定唔會放軟手腳。雖然主力射手尼達列治拿要坐波監，好彩弗賴堡仲有鋒將基科、尼斯彼德臣呢啲猛將攻堅。事實上呢班波今季火力驚人，26場聯賽勁轟57球，當中主場更見威力，13仗攻入37球，場均入球數字接近3球，再加埋佢哋近5仗贏晒，每仗至少攻入對方至少2粒，狀態咁弗，又真係唔使點擔心會突然失準啞火喇！
對手卡爾斯魯厄暫列中游位置，成績高不成低不就，搞到成隊波冇晒目標，近5仗僅得1勝，叫人點信得過先？更何況首席射手迪亞文達高斯陷入球荒，連累佢哋近3仗夾埋僅入1粒，大踢風流波，呢鋪造訪弗賴堡好難搶到分咯！