歐霸盃8強次回合賽事，力爭三連霸嘅西維爾返主場火併畢爾包，西維爾挾首回合領先2比1嘅優勢，今場可以大踢最擅長嘅快速反擊戰術，相反畢爾包為收復失地焗住搶攻，後防隨時暴露更多漏洞，而且西維爾近4次主場對畢爾包有3勝1和佳績支持，今仗再開主勝機會頗高。
（周五凌晨3時05分開賽）
畢爾包前後場大將缺陣
西維爾貴為「歐霸專家」，今屆以三連冠為目標一直保持高水準演出，首回合作客擊敗畢爾包已經一隻腳踏入4強，事關西維爾主場戰績強勁，近18戰主場賽事贏足17場，連同今年1月西甲主場以2比0砌低畢爾包在內，近4次主場鬥畢爾包贏3鋪，心理上佔盡優勢。
落後嘅畢爾包今場非勝不可，即使作客亦要盡地一煲主動進攻，可惜佢哋有防線核心人物拿樸迪養傷，面對反擊力強勁嘅西維爾肯定輸蝕，前鋒伊拿基威廉斯亦喺賽前宣布因傷缺陣。畢爾包近兩場作客比賽都以1比2落敗，今場睇怕都凶多吉少。