高普熟晒多蒙特路數
歐霸8強次回合焦點之戰，利物浦主場迎戰多蒙特，雙方首回合打和1比1，由於利物浦有1粒作客入球喺手，今仗守和0比0都可以晉級，加上「紅軍」主帥高普睇通晒昔日子弟兵路數之餘，出戰歐霸仲例派悶蛋，今屆踢11場開咗10次細，比率超過9成。今場一戰定生死，兩軍肯定更謹慎，值得再追入球細。
（now670周五凌晨3時05分直播）
利物浦現時排英超第8位，落後第4位嘅曼城9分，打入前4機會渺茫。如果想參加下屆歐聯，惟有奪取歐霸盃冠軍，「紅軍」對呢項「二奶盃」嘅重視程度，肯定高過德甲二哥多蒙特。因此領隊高普今仗應會以穩陣行先，即使再踢悶蛋足球守和0比0，被鬧衰仔都冇所謂，最重要係可以晉級。
歐霸10場開細有辦睇
目前呢支多蒙特嘅班底係由高普一手打造，對「蜜蜂兵團」路數可謂瞭如指掌，相信佢有計凍結兩位「蜜蜂射手」奧巴美揚同馬高列奧斯。事實上，利物浦今屆歐霸盃表現四平八穩，踢咗11戰都未輸過，取得4勝7和，雖然贏波率偏低，但就有10場開細，入球細的確好路。
蜜蜂兵團連場作客攰爆
多蒙特想晉級今仗必須入波先至有價講，但「蜜蜂兵團」日前喺聯賽作客激戰「魯爾區」宿敵史浩克04，接連作客體力消耗極大，未必可以恢復最佳狀態。再者多蒙特喺德甲基本上坐亞望冠，穩奪下屆歐聯入場券，爭歐霸盃意欲唔及利物浦，想攻陷「紅軍」穩固防線，並不樂觀。