英超今周中加開快車，今晚有神奇球隊利物浦主場迎戰愛華頓。「紅軍」近排係威係勢，佢哋喺歐霸盃8強次回合化腐朽為神奇，反敗為勝淘汰多蒙特躋身4強之餘，英超亦取得兩連勝，今晚火併人腳唔齊章、近6場聯賽未贏過嘅「拖肥糖」，莫講話趁勢贏多場，相信由頭贏到尾都冇難度，主主有成2.45倍咁好分頭，絕對係明智之選。
（now 621周四凌晨3時直播）
近期氣勢強勁嘅「紅軍」，日前喺歐霸盃8強次回合，大部分時間落後多蒙特兩球，但最後竟然可以反勝4比3，總比數贏5比4躋身4強，認真神奇！賽後見到成班「紅軍」球員興奮慶祝嘅情景，就知道佢哋依家士氣有幾咁高昂啦！
利物浦狀態弗到震
雖則「紅軍」喺聯賽爭奪前四機會好微，今季餘下時間應該會將所有精力集中喺歐霸盃，如果能夠成功封王，就可以攞到來屆歐聯嘅參賽資格。就算依家聯賽唔係佢哋嘅首要目標，但近兩場聯賽亦取得兩連勝。好似對史篤城一仗雖然進行輪換，但都可以4比1大勝。至於上場鬥般尼茅夫亦乘住氣勢以2比1擊敗對手。人腳方面，佐敦軒達臣提早收咧，賓迪基仍然養緊傷，但因為陣中大部分球員狀態都唔錯，雙線作戰都冇問題。
拖肥糖鋒線死晒火
另邊廂，愛華頓已經連續6場聯賽未贏過，其中近5場夾埋只射入2球，前線完全死晒火。事關「拖肥糖」傷停球員成籮，占士麥卡菲停賽，主力射手盧卡古、中場巴克里、艾朗連儂同後衞巴尼斯上場都冇份踢，今晚上陣成疑，加埋菲臘積基爾卡同湯卡華利養緊傷，大半隊人腳唔見晒，嚴重削弱整體實力。相信氣勢如虹嘅利物浦可以喺上半場就撕破雜牌軍愛華頓嘅防線，2.45倍「主主」博得過。