兩支力爭成為三冠王嘅歐洲豪門拜仁慕尼黑同巴黎聖日耳門（PSG），今晚喺盃賽分途出擊！德甲班霸拜仁慕尼黑喺德國盃4強戰主場迎戰雲達不來梅。論實力拜仁當然贏晒，但不來梅向來堅持進攻足球風格，今仗波大細中位數雖為3.5/4球，照追入球大！
（無綫翡翠台及TVB 13周三凌晨2時30分直播）
不來梅好攻同「仁」駁火
拜仁前線坐擁羅拔利雲度夫斯基及湯馬士梅拿，火力強勁人所共知，面對不來梅脆弱防線，相信球迷都唔會質疑拜仁入球能力。拜仁啱啱喺聯賽主場大勝史浩克04，今仗繼續喺主場出擊，相信會延續球隊主攻踢法，以取得多入球為目標。
雲達不來梅雖然牌面輸蝕，但球隊踢進攻足球嘅決心始終如一，近7仗作客賽事有6場嘅總入球達4球或以上，全部順利開出大盤。佢哋呢招「有前無後，打死罷就」嘅戰術其實亦偶有佳作，對上兩圈德國盃就分別作客贏慕遜加柏4比3，以及3比1淘汰利華古遜，今仗造訪安聯球場大有機會同拜仁合演入球騷。
伊巴謙撻着 捧ＰＳＧ「讓客」
至於法足盃4強方面，ＰＳＧ剛喺歐聯8強出局，球隊惟有力爭蟬聯國內三冠王，瑞典前鋒伊巴謙莫域上仗大勝卡昂入兩球兼交出兩次助攻狀態甚弗，面對有前鋒莫里基科芬拿及洛杜亞繼續缺陣嘅羅連安特，有望輕取對手打入決賽，一於捧讓球客勝。
（TVB 302周三凌晨3時直播）