當大家關注英超錦標誰屬嘅時候，英冠爭升班亦進入大直路，今晚爆發榜首大戰，「二哥」般尼主場對「一哥」米杜士堡。根據賽制，首兩位球隊可以直接升上英超，今場雙方都不容有失，否則被第3位嘅白禮頓反超前，就肯定頭痕。預料兩隊都會搏錘搶分，首選入球大。
（周三凌晨2時45分直播）
英冠常規賽只剩下4輪，榜首米杜士堡分別領先次席般尼2分、第3位白禮頓4分。至於般尼更只係領先白禮頓2分，如果今仗打和一齊失分，只會益咗白禮頓。因此，般尼今仗更加要把握地利優勢，全力爭勝，避免被白禮頓搶走前兩位直接升班資格。般尼勇態持續，近19場聯賽不敗，錄得13勝6和，包括作客打和白禮頓2比2，主場出擊唔怕同米杜士堡駁火。
白禮頓誓取昆士柏
米杜士堡上季踢升班附加賽輸波，痛失英超席位，今季當然唔想重蹈覆轍，對直接升班資格特別着緊。球隊季尾全力衝刺，取得6連勝，相信今仗作客都唔會退縮，入球大值博。
另一支爭升班勁敵白禮頓主場對昆士柏流浪，白禮頓上仗大炒富咸5比0，以佢哋近6場聯賽贏5場嘅強勢，可望輕取踢風流波嘅昆士柏流浪，捧主勝。