今晚英超獨腳戲阿仙奴主場迎戰西布朗。阿仙奴連續兩仗和波失分，不但畀曼城過咗頭跌落第4位，未計周四凌晨英超賽果，佢哋只領先第5位曼聯4分，前四嘅歐聯參賽資格唔係坐定粒六。由於阿仙奴嘅前四位置唔多穩陣，有傳兩大王牌奧斯爾同阿歷斯山齊士（A山），就續約問題hold住先唔傾住，為冧佢兩個留隊，係時候啟動前四mode，遇上幾近上岸、近4仗輸3仗嘅西布朗有力反彈，就算讓1.5/2球照撐上盤。
（now 621周五凌晨2時45分直播）
阿古路入英超100球
至於昨晨英超「3哥」曼城雖作客被紐卡素逼和1比1，但今仗明顯越位下為佢哋先開紀錄嘅射手阿古路，取得個人喺英超第100個士哥，不但成為英超史上第25個達百球大關嘅球員，呢位阿根廷國腳只用咗147場就達標為史上第2快，僅次於用咗124場就入100粒嘅英格蘭名宿舒利亞。