今午上演澳職季後賽4強戰，由常規賽亞軍西悉尼流浪者主場硬撼布里斯班獅吼。獅吼今季作客成績一般，其中最後4場作客輸3場，成為佢哋失落常規賽冠軍嘅關鍵，今季聯賽連盃賽3次造訪流浪者亦兩度輸波而回，加上佢哋比流浪者多踢1場體力輸蝕，就算受讓平半都捧唔過，一於撐流浪者1.74倍上盤。
（有線64台周日下午3時直播）
獅吼係今季澳職常規賽主場成績最佳球隊，可惜作客表現差天共地，13戰得3勝4和6負，得分僅僅多過榜尾兩隊中岸水手及威靈頓鳳凰，單計最後4場客戰，只得1和3負劣績，全無勁旅風範。查實獅吼若果喺煞科日作客擊敗半力出擊嘅墨爾本勝利，就會奪得常規賽冠軍，點知最終只能夠同對手互交白卷，白白錯失封王機會，加上佢哋今季3次造訪流浪者得1勝2負嘅成績，今次再作客出戰難抱任何期望。
獅吼體力往績都輸蝕
由於流浪者最後1輪以2比0擊敗鳳凰，憑較佳得失球差壓倒獅吼取得常規賽亞軍，得以直接進身4強兼享有主場之利，令跌落第3嘅獅吼，要多打1場季後賽、兼且激戰到補時才反勝墨爾本勝利2比1晉級，體力明顯比以逸待勞嘅流浪者輸蝕。不妨再睇埋賠率，雖然獅吼有得受讓平半，但竟然有逾2倍咁高水，邊有咁大隻蛤乸隨街跳呀，擺明莊家都睇淡獅吼，波童認為各方面佔優嘅流浪者，可贏波殺入決賽，上盤不容錯過。