當歐聯進入爭標大直路，亞冠盃亦嚟到最後1輪分組賽，部分球隊已獲出線權或出局，投注前最緊要睇清楚各隊形勢及戰意。G組澳職墨爾本勝利今晚主場出擊，只要擊敗已篤定出局嘅日職球隊大阪飛腳，就可以進身16強，肯定搶韁積極求勝，可望半場就攻陷對手，博半場主勝。
（now 671周二晚6時直播）
G組形勢上海ＳＰ（上海上港）已穩奪首名出線權，餘下1席成為墨爾本勝利同水原藍翼之爭，兩隊現時同得6分，但墨爾本勝利以對賽時取得較多作客入球壓住藍翼，所以今仗只要贏波就肯定出線，目標夠晒鮮明。而且澳職經已收咧，墨爾本勝利有充足時間休息及備戰，叉足電出擊勢必先下手為強，盡快入波以免夜長夢多。
大阪飛腳今季成績大倒退，亞冠盃踢咗5場未贏過，如果包括聯賽在內，近9仗更輸咗7場，狀態低迷，加上今仗對佢哋嚟講係例行公事，倒不如將精力放番喺聯賽諗下點追分更實際。
上海ＳＰ出副選明醒藍翼
同組南韓球隊水原藍翼主場對中超球隊上海ＳＰ，藍翼需寄望墨爾本勝利失分，先至有機會出線，形勢比較被動。好消息係上海ＳＰ已獲出線權，並事先張揚會派年輕球員上陣攞經驗，水原藍翼應可輕取對手，博讓球主勝。
（now 670周二晚6時直播）
ＦＣ廣州全華班捱「細」界
另外，H組ＦＣ廣州（廣州恒大淘寶）主場對ＦＣ悉尼，上屆冠軍ＦＣ廣州意外分組賽就篤定出局，加上有5人受傷缺陣，唔會浪費精力喺今場例行公事。ＦＣ廣州主帥史高拉利已透露將派全華班應戰，同時亦係隊長鄭智第200場為球隊上陣，做騷味濃。ＦＣ悉尼已獲出線權，亦唔慌會搏，寧揀入球細。
（now 672周二晚6時30分直播）