英冠「常規賽」煞科上演1.7億鎊（約19億港元）英超入場券爭奪戰，米杜士堡主場對白禮頓！第2位米堡今場和波就可以直接升上英超，第3位白禮頓需要贏波，先至能夠獲得直接升班資格。兩隊心態大不同，預料米堡會以穩守求不敗為前提，反觀白禮頓應會豁出去搏盡爭勝。米杜士堡讓平半，寧博白禮頓下盤。
（TVB 301周六晚7時30分直播）
根據賽制，英冠頭兩位球隊可以直接升上英超，第3至第6位球隊需要踢附加賽，爭奪餘下1個升班席位。榜首般尼已穩奪升班權，另1個直接升班資格屬於米杜士堡同白禮頓之爭。由下季開始，英超未來3年轉播費大幅增加，就算升上英超1季就降班，亦可確保未來3年有1.7億鎊收入，今仗簡直係1場金礦爭奪戰。
米堡求和心態難讓波
兩隊現時同分，米堡得失球較佳，換言之今場唔輸已完成任務，心態上難免會比較保守。事實上，米堡由前皇馬助教卡蘭卡領軍，採取穩健戰術，今季45場聯賽只入62球，仲少過第10位嘅賓福特，但勝在防守出色，成為失波最少球隊。嚟到關鍵時刻，相信卡蘭卡更加唔敢冒險，但求不敗已收貨。加上米堡已經3連和，今場亦唔需要贏，讓波有好大風險。
白禮頓火力英冠最強
至於白禮頓就算輸波，都可以參加升班附加賽，如果贏埋，更可直接升班，幾乎係「零成本」，唔怕豁出去一博。白禮頓鋒力屬於英冠最強，有充足本錢主攻，佢哋近3次作客米堡，取得2勝1和兼冇失球，加上近6場聯賽取得5勝1和嘅強勢，贏埋都唔奇，受讓抵玩。