3雄爭霸衝刺 打吡戰唔衰得
西甲三雄爭霸現時鬥到叮噹馬頭，最後兩輪聯賽1分都不能少。今晚10場西甲同時開賽，近期回勇嘅巴塞隆拿主場擺陣同愛斯賓奴上演「加泰羅尼亞打吡」。巴塞「MSN」組合美斯、蘇亞雷斯同尼馬近期愈戰愈勇，令賽事瀰漫大開殺戒嘅味道，讓球主客和巴塞讓到三球都照捧讓球主勝。
1個月前喺榜首遙遙領先嘅巴塞，目前只係靠較佳對賽成績壓住同分嘅馬德里體育會，要衞冕成功餘下兩仗絕對不容有失。幸好巴塞自從歐聯出局後，球員\回到氣，近期已重現霸氣，近3仗聯賽全勝兼且1球不失，射手蘇亞雷斯更喺3場入面入咗9球，狀態弗到漏油。至於愛斯賓奴現時仍有降班危機，不過今仗要喺巴塞身上搶分真係難過登天，事關佢哋近5次作客魯營球場都輸波，當中4場重要慘敗3球或以上。愛斯賓奴今年2月作客皇家馬德里曾經慘吞6蛋，今仗就算係打吡戰似乎都會有相類似嘅結局。
（now 632周日晚11時直播）
皇馬大得起華倫
排第3嘅皇家馬德里喺西甲打出10連勝走勢，成功重燃爭標希望，但周日晚迎戰「神經刀」華倫西亞必將面臨苦戰。華倫西亞今季曾多次令強隊吃苦頭，兩戰巴塞隆拿獲1勝1和，首循環亦曾打和皇馬，今仗即使來到巴拿貝球場亦有信心搶攻。翻查數據，兩隊近6次聯賽交鋒都上演入球騷，其中5仗總入球達4球或以上，近兩次喺巴拿貝球場交手都踢成2比2平手。
華倫西亞現時無欲無求，可以放開懷抱踢最擅長嘅進攻足球，今仗捧入球大屬明智之選。
（now 633周日晚11時直播）
馬體會客W圖利
至於「二哥」馬德里體育會目前同巴塞同分，只係等待巴塞一次犯錯就有機會後上封王。馬體會雖要分心歐聯，但佢哋喺聯賽依然取得6連勝，全靠近4仗零失球嘅鋼鐵防線，只要射手基沙文、費蘭度托利斯或沙奧尼古斯入到一球，就足以全取3分。何況今仗對手利雲特已篤定降班，搏嚟都唔知為乜，相信難阻決心爭標嘅馬體會，客勝必捧！
（now 631周日晚11時直播）