今晚英超焦點賽事一定係曼城主場硬撼阿仙奴！「三哥」兵工廠同曼城只係相差3分，如果今晚曼城能夠順利擊敗阿仙奴全取3分，咁佢哋就能夠以較佳得失球超越兵工廠。主隊曼城啱啱喺歐聯被皇馬淘汰出局，成班球員仲谷住道氣，今晚返到嚟聯賽，相信一定會全力大爆發，誓要擊敗對手，重振聲威；反觀作客嘅阿仙奴士氣低落，一眾廠迷對領隊雲格怨聲四起。論心態同實力，主隊佔盡上風，今晚讓球盤開出平手盤，相信曼城要贏波絕對唔難，捧曼城有1.77倍坐和望贏。
（now 621周日晚11時直播）
射手榜落後2球有得追
曼城最近認真黑仔呀！佢哋先喺聯賽爆冷以2比4大敗畀修咸頓，痛失3分。之後又喺歐聯4強次回合對皇馬時，因為守將費蘭度法蘭斯高擺烏龍，引致球隊以0比1僅負，兩回合計以相同比數被「銀河艦隊」淘汰出局。最慘就係隊長高柏尼開波10分鐘就受傷退下火線，既輸波又輸人，認真陰功！
門將赫特賽後仲好唔忿氣，話球隊只係輸運，否則可以輕鬆打敗皇馬，仲話曼城喺歐聯4強止步後，可以更加專心喺聯賽搶分，保住前四席位。主力射手阿古路暫時以23個聯賽入球排喺神射手榜第2位，僅落後榜首嘅哈利卡尼兩球。相信阿古路為個人名譽，今晚會化身做「阿古獸」，On fire全力爭取入球。
廠迷嬲爆嗌雲格落台
另邊廂，阿仙奴雖然上場以1比0小勝諾域治，重回勝軌，但一班廠迷對領隊雲格已經忍無可忍喇！酋長球場反對雲格嘅橫額隨處可見，球迷亦不斷大叫口號，懇求雲帥落台，搞到球場內外嘅氣氛非常惡劣，大大打擊阿仙奴士氣，今場作客出擊可謂未打先輸呀！讓球盤開出平手盤，1.77倍嘅曼城絕對值得支持。