葡超今晚煞科，兩支里斯本球隊鬥得非常激烈，榜首賓菲加今仗主場只要擊敗國民隊，就可以完成三連霸，但如果佢哋失分而「二哥」士砵亭擊敗布拉加，冠軍則落入士砵亭之手，形勢勁緊湊。貴為葡超班霸，賓菲加喺關鍵時刻應該唔會甩轆，即使讓球主客和要「-2」，照撐讓球主勝。（周一凌晨零時開賽）
賓菲加因對賽成績較差，一旦與士砵亭同分過終點，就會失落冠軍寶座，所以賓菲加絕對冇失分空間。賓菲加始終係葡超頂班球隊，聯賽之中除咗士砵亭同波圖之外，其他球隊難以對佢哋構成威脅，更何況今仗關乎冠軍誰屬，賓菲加相信會出盡全力，入多幾粒「保險球」甩開對手，以免夜長夢多。況且對手國民隊已經冇嘢好爭，戰意成疑，隨時放軟手腳，有球必應。
士砵亭「大」起布拉加
同時間開波嘅布拉加主場對士砵亭，相信士砵亭仍然會全力爭勝，再博賓菲加失分。以士砵亭8連勝強勢，要攻入布拉加大門並唔難，但要留意嘅係，如果另一場賓菲加一早大比數領先，士砵亭或會因而洩氣，令布拉加有機可乘，最好揀入球大。