話咁快黎到英超煞科戰喇！今屆英超冠軍已經名花有主，而降班球隊亦都大局而定，所以今晚嘅焦點反而落喺要爭入前四嘅紅魔鬼身上。暫時位列第5嘅曼聯只係落後第4位嘅曼城2分，如果佢哋喺最後一輪賽事能夠勝出，而同時曼城輸波嘅話，咁佢哋就可以喺曼城手上搶走「四哥」之位，奪得來季歐聯入場券。今晚曼聯將會喺奧脫福球場迎戰下游球隊般尼茅夫，相信會齊心協力，踢番場爭氣波。讓球主客和開出曼聯讓一球，捧1.97倍讓球主勝。
（now 622周日晚10時直播）
馬迪爾fb最佳年輕球員
曼聯上半季嘅表現差強人意，但去到下半季時間佢哋終於重返正軌喇！除咗殺入足總盃決賽之外，喺聯賽仲重燃爭奪來季歐聯參賽機會。雖然佢哋上輪聯賽畀韋斯咸反勝3比2全失3分，但睇番佢哋場上嘅表現，絕對係合格有餘架！尤其係梅開二度嘅安東尼馬迪爾，呢位小將今季為曼聯上陣30場聯賽，合共取得11個「士哥」，係球隊嘅首席射手。佢仲啱啱擊敗熱刺新星迪利阿里，成為網民嘅心水，當選facebook本年度最佳年輕球員添，風頭認真厲害！況且外傳領隊尹戈爾如果唔能夠帶領曼聯殺入前四嘅話，就會被炒魷。相信一向要面子嘅尹帥喺最後關頭，一定會做番場好戲畀大家睇。再加上今場係曼聯今季最後一場主場賽事，佢哋主場威力不嬲有番咁上下，近7場主場聯賽未輸過，當中有5場更係保持清白之身添！今晚主場出擊贏波在望。
般尼茅夫已有收咧心態
另邊廂，客隊般尼茅夫早已上岸，完成佢哋今季嘅任務。作為一支升班球隊，喺第一季英超就能夠提早護級成功，就算餘下比賽大踢「風流波」，球迷都唔會怪佢哋嘅。睇佢哋近4場比賽1和3負，就知道成班球員等緊收咧放暑假喇！論實力同戰意，曼聯佔盡上風，相信今晚佢哋可以大炒對手，[-1]主勝絕對係值得信賴。