上輪「撲完水」 煞科做好戲
今晚西甲煞科護級大激鬥，近期備受假波醜聞困擾嘅尾二球隊華歷簡奴，喺主場對包尾嘅利雲特，驚唔驚佢哋又出蠱惑呀？不過初盤「華奴」要讓球半咁多，而且飛數堅硬淨，肥叔一向睇盤做人，認為「華奴」會做番齣好戲，上盤值得持有。
（now 631周一凌晨1時30分直播）
查實好多西甲球隊都勒緊褲頭過日子，有啲更不惜鋌而走險「造假」撲水，近日傳出華歷簡奴上輪作客皇家蘇斯達打假波醜聞，要護級嘅「華奴」原本係較熱嗰隊，竟然愈賣愈冷，最後果然輸波收場。
雖然「華奴」呢班波蠱蠱惑惑，但單嘢「黃咗」就唔可以再咁揚，何況依家排緊尾二，落後尾三希杭及「安全線」尾四嘅基達菲1分，肥叔當佢哋上仗「袋咗一筆」，今仗點都要踢番場好好睇睇嘅波，為護級搏命搶分啩。
同上仗飛數大變嘅情況好唔同，華歷簡奴今仗主場迎戰篤定降班嘅利雲特，初盤「華奴」就要讓到球半咁多兼低水，飛數仲異常硬淨，睇嚟莊家完全冇受佢哋上仗疑似出蠱惑所影響，既然莊家夠膽開到咁辣，肥叔認為值得跟番多少。
基達菲讓得辣上盤有計
同時間進行嘅貝迪斯主場對基達菲，希杭主場對維拉利爾，基、希依家同得36分，基達菲靠較佳對賽成績壓住對手，只要贏波就護級成功，若果失分而希杭贏波梗係降班喇，值得一提係，假如兩隊齊齊輸波，而華歷簡奴打和利雲特的話，「華奴」便追至同分，並憑較佳對賽成績力壓基、希上岸。
睇埋初盤，基達菲作客要讓半一咁辣，但見大戶都入定少少上盤，似乎有計喎。（now 632周一凌晨1時30分直播）另一場希杭對維拉利爾，肥叔睇唔通不作推介。
（now 633周一凌晨1時30分直播）
意甲煞科方面，焦點亦放喺護級，現時「安全線」尾四嘅巴勒莫，只領先尾三嘅卡比1分，但足智彩偏偏唔開巴勒莫主場對維羅納場波，相信同維羅納護級失敗、隨時放水不無關係。所以肥叔推介另一場卡比作客烏甸尼斯，初盤烏甸要讓平半，但要留意佢哋已經上岸，近6仗僅1勝表現唔多掂檔，肥叔寧信護級心切嘅卡比。