西甲爭霸最後衝刺
西甲今周煞科，「巴皇」鬥到最後衝線，今晚上演關乎冠軍誰屬嘅兩場「決賽」，榜首巴塞隆拿作客CF格蘭納達，次席皇家馬德里就作客拉科魯尼亞。巴塞距離衞冕成功只差一步，今仗只要贏波即可封王，毋須理會皇馬嘅賽果，挾住4連勝狂轟21球嘅氣勢，勢必上演大屠殺，就算讓二球照撐讓球客勝。
（now 632及Viu TV 99台周六晚11時直播）
格蘭納達上岸唔慌搏
「地上最強」早前被馬體會及皇馬狂追至優勢大減，好彩近半個月佢哋重新嚟料，近4仗聯賽全勝、狂轟21粒兼冇失波之餘，其中3仗更大勝對手5球或以上，火力相當恐怖。由於巴塞領先皇馬1分，今仗贏CF格蘭納達就可順利蟬聯聯賽冠軍，鋒線「MSN」美斯、蘇亞雷斯及尼馬，喺之前4仗有3仗齊齊入波，今仗捧盃派對實會搏盡爭士哥。CF格蘭納達上仗贏西維爾後，宣布上岸，既然已完成目標，今仗變為例行公事唔慌搏，造訪對贏波3分志在必得嘅巴塞，CF格蘭納達實力又差幾條街，亦無謂阻人發達，讓球主客和巴塞讓二球都照跟。
拉科近3次對壘失15球
至於同時間進行嘅皇馬作客拉科，「銀河艦隊」現時落後巴塞1分，今仗要贏波之餘，仲要望巴塞失分先可後上奪冠。雖然機會麻麻，但已殺入歐聯決賽嘅皇馬，相信會做好本分贏咗先算。而且王牌C朗目前喺射手榜落後蘇亞雷斯4球，以佢咁好勝絕唔會輕易投降，呢位葡國萬人迷，上季作客拉科就試過「戴帽」，帶領皇馬狂數8比2，佢梗係想再重演呢幕啦，加上皇馬近3次對拉科贏晒，合共15次轟破對方大門，以拉科近7仗僅1勝嘅頹勢，「銀河艦隊」再炒佢哋唔難，讓二球亦要讓球客勝。
（now 633周六晚11時直播）