柏雷素爾殘陣難偷雞
今輪有3場賽事喺周五晚上演，當中包括廣島三箭對柏雷素爾嘅前列對決。兩軍近況都唔錯，三箭雖然響亞冠出局，不過佢哋主場仍取得5連勝，柏雷素爾亦都作客4連勝，日媒都期待有場精彩好波，不過柏雷素爾陣容太殘，宜吼三箭上盤同大盤。
（有線64及203台周五下午6時30分直播）
三箭主場表現向來超穩定，近5仗主場賽事除咗全勝外，夾埋只係失咗1球，即使守將川崎裕大及佐佐木翔兩位主力養傷，防線仍然畀到人足夠嘅安全感，何況米傑治、柏好文、彼得烏達卡幾個響邊線都好活躍，今仗主場出擊，贏面在對手之上。
三箭主場往績利大盤
柏雷素爾較早前更締造兩線作戰7連勝嘅佳績，齋計作客亦4連勝僅失1球，夠晒硬淨，直至上輪聯賽主場先至吃悶棍輸畀川崎前鋒。柏雷素爾近期狀態雖有保證，但守將今井智基、中場山中亮輔及射手伊東純也養傷，另一守將中谷進之介就要停賽，中場祖尼安奴明尼路又未必出得，陣容不整作客焗踢守勢波，咁被動，小負真係還得神落。
但係呢兩隊喺三箭主場交手16次，10次開大，而且三箭贏嗰7場，只得1次僅勝1比0，其餘6場兩球起碼，仲開過5比2呢類波膽，博埋大盤都無妨。