歐洲主要聯賽煞科後，俄超亦來到尾二新一輪聯賽，榜首莫斯科中央陸軍領先第2位羅斯托夫2分，換言之只要贏晒餘下兩仗就可以捧盃，肯定疊埋心水衝埋佢，力爭全勝。中央陸軍今晚主場鬥卡斯洛達定必搏盡，以中央陸軍聯賽主場5連勝強勢，主W穩陣屬過關首選。
（有線64、203台周二凌晨零時30分直播）
莫斯科中央陸軍今季大部分時間獨佔鼇頭，季尾表現愈戰愈勇，近4仗聯賽全勝，如果單計聯賽主場更加5連勝。中央陸軍喺月初俄盃決賽輸波後，肯定更加落力爭聯賽冠軍，避免四大皆空，爭勝決心必高。卡斯洛達已爭標無望，而且上月俄盃4強作客1比3不敵莫斯科中央陸軍，有辦畀大家睇。事實上，卡斯洛達近5次作客中央陸軍僅錄1勝1和3負，今仗難有突破。
至於羅斯托夫主場對烏拉爾，羅斯托夫依家先求做好自己，總之要贏波，並寄望中央陸軍失分才可反超前，今仗對手烏拉爾踢緊風流波等收鑼，相信羅斯托夫可大勝壯聲威，主Ｗ1.17倍熱爆燈欠分頭，可直取1.7倍讓球主勝。
白禮頓焗攻「大」反擊
另外，英冠升班附加賽4強次回合，白禮頓主場對錫周三，白禮頓首回合輸0比2，今仗焗住豁去出搶攻，爭取收復失地，反而令防守更加空虛，入球大捧得過。
（TVB 301周二凌晨2時45分直播）