今晚意大利盃喺中立場羅馬奧林匹高球場上演終極對決，由今非昔比嘅AC米蘭硬撼衞冕嘅祖雲達斯。祖記早早於歐聯出局，今季目標鎖定蟬聯國內雙冠，佢哋已經攞到聯賽冠軍，對意盃更加志在必得，主力保羅普巴已開晒聲話力爭連續兩季做雙冠王，加上近7次交手贏晒，1.61倍客W有買趁早。
（周日凌晨2時45分開賽）
AC米蘭今季聯賽只列第7位，意盃已係佢哋爭取來屆歐霸入場券嘅最後機會，不過睇番「紅黑兵團」今屆晉級過程，除咗卡比、森多利亞屬意甲下游球隊，其餘佩魯賈、克羅托內及4強嘅阿歷山迪亞更是意乙、甚至更低組別對手，猶如執到上上籤，況且自布洛治中途接手執教後，AC只獲得2勝2和2負成績，睇見都唔開胃，今遇班霸祖記勢必遇上真正考驗。
保羅普巴信心十足
祖雲達斯今季於歐聯16強早早畀拜仁淘汰，因此集中火力喺國內賽事，查實佢哋上季係意甲及意盃嘅雙冠王，喺國內真係玩晒，隨住祖記有驚無險奪得今季聯賽錦標，實現意甲5連冠嘅霸業後，全隊上下都渴望擸埋意盃。祖記中場核心保羅普巴更好大口氣咁話，佢哋會全力以赴擊退AC，連續兩季做雙冠王。而且睇番往績，祖記近7次對AC獲得全勝佳績，擺明食住對手，今仗贏波捧盃機會高唱入雲，客W有計。