啱啱喺亞冠盃16強出局嘅浦和紅鑽今午作客鬥鳥棲砂岩。雖然紅鑽上周中同FC首爾激戰120分鐘，最後射輸12碼飲恨，不過佢哋目前係聯賽失分最少嘅球隊，爭奪首階段冠軍仍然有優勢，既然冇咗亞冠盃負擔，球隊集中番火力喺聯賽，熱捧客勝。
（有線64台周日下午3時直播）
經過上周中16強次回合，日職球隊喺今屆亞冠盃已經全軍盡墨，紅鑽算係幾支參賽球隊入面，聯賽成績影響較少一隊。紅鑽踢咗11場聯賽取得8勝2和1負，落後榜首川崎前鋒2分，但少踢2場，大有機會後來追上，就算上場搏足120分鐘，為爭首階段冠軍今場亦冇得放軟手腳。鳥棲砂岩近7仗聯賽只係贏過仙台維加泰，其餘6仗1和5負兼冇入波，實力有限，主場出擊都難對紅鑽構成太大威脅，客Ｗ穩陣。
ＦＣ東京士氣低反得過
另一支喺亞冠盃出局嘅球隊ＦＣ東京今日主場鬥大阪飛腳，ＦＣ東京上場亞冠盃作客上海ＳＰ喺完場前一刻失守被淘汰，士氣嚴重受挫。而且佢哋之前4次踢完亞冠盃賽事，返番本土聯賽只係贏過包尾大幡湘南比馬，其餘3仗1和2負，亞冠盃後例必冇貨賣。大阪飛腳早早喺亞冠盃分組賽出局，近期唔使一周雙賽，表現回復昔日勁旅本色，近2仗接連擊敗磐田山葉及廣島三箭，平手盤捧客軍。
（有線61及201台下午4時直播）