今晚最有睇頭嘅國際熱身賽，非歐國盃爭標熱門德國主場迎戰斯洛伐克莫屬。德國今次共點27人，仲要踢走4個才定出歐國盃大軍名單，預計會上陣嘅祖利安白蘭特、利萊辛尼等「生牯仔」會搏命爭上位，德軍近年喺自己地頭「拍跳」例多波入，之前7仗場均總入球至少有3粒，撞正攻力唔曳嘅斯洛伐克，預期會合演入球騷，大盤值得捧場。
（TVB 13及J5周日晚11時45分直播）
距離歐國盃決賽周開幕得番唔夠兩周，各路大軍為備戰紛紛踢熱身賽，德國早前公布27人初選名單，除咗湯馬士梅拿、馬高列奧斯、謝路美保定等主力悉數入選外，仲召入祖利安白蘭特、祖利安韋高、甘美治、利萊辛尼等「生牯仔」，最終還要剔除4人，落實23人大軍名單。主帥勒夫之所以咁做，因為「小豬」舒韋恩史迪加、賀維迪斯、達斯拿等都係啱啱好番，狀態令人擔心，勒夫補入呢班「生牯仔」，希望透過訓練及「拍跳」觀察佢哋掂唔掂，萬一「小豬」等有乜依郁，佢都唔會冇人用，因此今晚惡鬥斯洛伐克，成為佢哋嘅「考牌戰」，如果想有得留低踢歐國盃，實會搏晒命爭取表現喇。
賓特尼奴首次把關
德國於無關痛癢嘅熱身賽表現曳爆，兩年來7次喺主場「拍跳」只錄得2勝2和3負成績，但入球數字相當多，德軍剛於3月主場與英格蘭及意大利交鋒，兩仗入咗6粒，但失咗4球，賽前更宣布今仗起用未有「喼帽」嘅門將賓特尼奴代替紐亞打正選，試陣味濃，真係有前冇後、打死罷就。
斯洛伐克入得失得
斯洛伐克同樣打入今屆歐國盃決賽周，雖然前線名將維迪因年老落選，但由拿玻里中場核心咸錫領軍，組織及入球能力同樣咁堅，近5場「拍跳」共轟11粒，但面對包括瑞士、冰島、愛爾蘭、格魯吉亞等二線對手亦共失6球，入得又失得，作客面對鋒力強橫的德國鬥攻都似，大盤有計。