聽朝美洲盃輪到D組開打，首輪即上演上屆決賽翻版，由大熱門阿根廷硬撼衞冕嘅智利。智利自今年易帥後成績大插水，冇晒上屆永不放棄嘅韌勁，相反「潘帕斯雄鷹」復仇心切，隊長美斯雖然未必出得，但佢落晒「柯打」要一雪前恥兼開個靚頭，1.8倍主勝好路。
（now 650周二早上10時直播）
智利換教頭成績插水
上屆美洲盃決賽，有主場之利嘅智利同阿根廷激戰120分鐘互交白卷，最終互射12碼利智贏埋4比1，歷史性首度封王，主力如阿歷斯山齊士及維達爾等所表現出嘅飢渴感，成為奪冠關鍵。但功勳主帥森柏奧利因不滿智利足總，喺年頭劈炮唔撈，要知道呢位「瘋子教頭」比爾沙嘅徒弟擅於激勵球員，令智利上下團結一致，絕對係精神領袖。不過，當前西班牙國腳祖安比斯接替森柏奧利掌舵後，明顯未摸熟隊波，智利成績即時插水，連熱身賽及世盃外在內，佢帶隊打咗4仗，只係錄得1勝3負劣績，包括3月喺主場以1比2輸畀阿根廷，擺明唔多掂檔。
美斯恨捧盃證球王身價
阿根廷上屆大熱姿態失落冠軍，令美斯未能打破入選一隊後嘅國際大賽錦標荒，今屆誓要捲土重來，捧走美洲盃證明自己球王地位。美斯上周熱身賽贏洪都拉斯之役傷出，雖然已復操但未必出得，不過佢受訪時落晒「柯打」，話分組賽至少要擸6分，因此開靚個頭好重要，況且阿根廷仲有希古恩、迪馬利亞及阿古路等好手，聽到大佬「柯打」梗係識做，加埋上屆決賽輸波之恥，必定燃起眾將復仇嘅火燄，趁智利跌Watt踩多兩腳，以兩軍近4次交鋒阿根廷贏3次嘅氣勢，主勝有1.8倍千祈咪走雞。